Orania in Amerika: Bou bande versterk visie
Deur Vierkleur Media, soos verskaf deur die Orania Beweging.
Die wêreld verander vinnig, en wanneer geleenthede ontstaan om insig te deel en alliansies te bou, moet dit met erns en verantwoordelikheid benut word. Ons is dankbaar om te bevestig dat ’n afvaardiging van die Orania Verteenwoordigende Raad en die Orania Beweging, vergesel deur dr. Ernst Roets as raadgewer en fasiliteerder, hierdie week in die Verenigde State van Amerika aangekom het vir ’n diplomatieke besoek.
Hierdie besoek is die gevolg van maande se voorbereiding en is daarop gemik om gesprekke te voer met instellings, organisasies en individue wat belangstel in die toekoms van selfstandige gemeenskappe.
Die wêreld kyk weer na Afrikaners. Dit is duidelik dat daar nuwe vrae ontstaan oor identiteit, volhoubare gemeenskapsmodelle en kulturele selfbeskikking. In dié konteks is dit van uiterste belang dat Orania se benadering – wat gebou is op eie arbeid, vrywilligheid, Christelike waardes en gemeenskapsverantwoordelikheid, met integriteit en duidelikheid verduidelik word.
Orania se model bied nie net ’n historiese narratief nie, maar ’n aktiewe, lewende alternatief — ’n manier van doen wat op gemeenskapsinisiatief, selfwerksaamheid en verantwoordelikheid gebou is. Dit is nie ’n abstrakte ideaal nie, maar ’n werklikheid wat daagliks opnuut bewaar en opgebou word. En soos altyd bly ons daarvan oortuig:
die pad na vryheid loop nie deur ideologie of debat alleen nie, maar deur die volgehoue, eerbare harde werk van ons eie mense.
Drie doelwitte staan sentraal
Volgens die Orania Beweging se verklaring is daar drie hoofdoelwitte met hierdie besoek aan die Verenigde State.
Eerstens, om Orania se benadering tot selfstandigheid in ’n hedendaagse konteks te verduidelik as ’n volhoubare, vreedsame en positiewe model vir die bevordering van minderheidsregte in ’n wêreld wat al hoe meer sentralisties en uniform word.
Tweedens is daar die belangrike kwessie van die Afrikaners se verhouding met Amerika. Dit sluit in die duisende jong Afrikaners wat tans in die VSA werk, asook die groot groep wat ernstig oorweeg om hulle daar te vestig. Wat maak Amerika só aantreklik vir Afrikaners? Dit is van kardinale belang om te verstaan hoe ons mense dink en wat vir hulle werklik saak maak. Orania se leierskap moet ’n langtermynvisie ontwikkel vir gekonsentreerde gebiedsvestiging in die Noord-Kaap, en dan moet Orania wesenlike mededingende voordele bied om as ’n voorkeur-bestemming bo die VSA verkies te word.
Derdens moet Orania se mense bande smee met lede, ondersteuners en ander eendersdenkendes in die VSA. In sommige Amerikaanse state is daar meer konserwatiewe Amerikaners as wat daar Afrikaners is! Daarom is dit belangrik om hierdie vriendskappe te koester en verder uit te bou.
Diskresie en respek
Dit is belangrik om te noem dat nie alle ontmoetings in die openbaar gedeel sal word nie. Dit is ’n internasionale standaard om eers gesprekke te voltooi voordat besonderhede vrygestel word. Ons wil ook ons gashere met respek hanteer en seker maak dat gesprekke eerlik en konstruktief verloop.
Die Orania Beweging wil hiermee hul opregte dank uitspreek vir die gebede, bydraes en bemoedigende boodskappe wat ons vanaf regoor Suid-Afrika, en selfs van internasionale ondersteuners ontvang het. Hierdie diplomatieke besoek aan die Verenigde State sou nie moontlik gewees het sonder die getroue betrokkenheid van die breër gemeenskap wat in Orania se roeping en toekoms glo nie.
Die Een-Oog-Afrikaner 
Joost Strydom op internasionale mediaplatform 
6 April – Stigtingsdag van ‘n Volk 
Wie was die werklike begunstigdes van apartheid? 
Trump se tariewe sorg vir globale markskok 
Is selfbeskikking radikaal, of net rasioneel? 
Vierkleur Media word Vryheid Media! 
Voortrekkermonument kry nie staatsgeld weens standpunt oor transformasie